Direktoratet for forvalting og økonomistyring (DFØ) er i instruks, fastsett av Finansdepartementet (FIN), delegert forvaltinga av økonomiregelverket. DFØ sine fullmakter er òg omtalte i fleire av dei faste rundskriva frå FIN til statsforvaltinga, sjå regjeringen.no.
DFØ skal som regelverksforvaltar formidle kunnskap om korleis statlege verksemder skal eller kan etterleve økonomiregelverket. Forvaltinga inneber at vi skal fortolke, informere og rettleie om krava i regelverket, og vi skal vurdere behov for vidareutvikling og gje råd til FIN om endringar. Vi behandlar søknader frå departement og verksemder om unntak frå krav i økonomiregelverket.
Om DFØ
DFØ hadde i 2022 fem divisjonar. Divisjon for styring, organisering og leiing (SOL) forvaltar blant anna økonomiregelverket, utgreiingsinstruksen, statens konsernkontoordning og statsrekneskapen.
Lønsdivisjonen og Rekneskapsdivisjonen i DFØ leverer løns- og rekneskapstenester til nærare 90 prosent av statlege verksemder. Dei to divisjonane er tenesteytarar og svarer på spørsmål frå løns- og rekneskapskundar. Førespurnadar frå kundar om økonomiregelverket som er av prinsipiell karakter, eller tema der regelverket kan opplevast som uklart for verksemdene, skal sendast vidare til regelverksforvaltar.
Om denne rapporten
I samsvar med tildelingsbrevet for 2023 har vi utarbeidd denne årlege rapporten om forvalting av økonomiregelverket. Rapporten peikar også på eventuelle forhold av gjennomgåande karakter som har kome fram i Dokument 1 frå Riksrevisjonen for revisjonsåret 2021. Rapporten orienterer vidare om strategisk viktige enkeltoppgåver for DFØ innanfor regelverksområdet i 2023.